Ekkert verður af því að Sneijder fari til Inter

Sagan endalausa um það hvort Hollendingurinn Wesley Sneijder fari til Inter eður ei virðist hafa tekið enda. Hann er víst ekki á förum til Mílanóborgar eftir allt saman.

Fregnir fyrr í dag voru á þann veg að hann myndi ganga í raðir Inter í kvöld en það virðist nú endanlega vera úr sögunni.

Ástæðan ku vera sú að Sneijder hafi sjálfur hætt við á síðustu stundu. Miðlar sögðu Sneijder vera í flugi til Mílanó í morgun en hann hætti við að fara um borð í vélina.

Hann vill berjast fyrir sæti sínu hjá Real Madrid sem mun þrátt fyrir það halda áfram að reyna að selja hann.