Frá varamannabekk Fredrikstad til AC Milan?

Samkvæmt norskum fjölmiðlum í dag er framherjinn Dominic Adiyiah, liðsfélagi Garðars Jóhannssonar hjá Fredrikstad í Noregi, líklega á leið til ítalska stórliðsins AC Milan.

Hinn tvítugi Adiyiah stal senunni á HM U-20 ára landsliða á dögunum þar sem Gana vann heimsmeistari og framherjinn varð markakóngur mótsins með átta mörk.

Eftir það fékk norska félagið nokkrar fyrirspurnir um leikmanninn, meðal annars frá AC Milan og flest virðist benda til þess að hann fari þangað í janúar.

Kaupverðið er sagt vera í kringum 1,5 milljónir evra en það skrýtna í þessu öllu saman er að Adiyiah hefur ekki einu sinni átt fast sæti í liði Fredrikstad og byrjaði síðast leik fyrir félagið í norsku deildinni í maí.