Button: Engin pressa að vinna titilinn

Jenson Button segir að engin pressa sé á honum að vinna meistaratitilinn í Formúlu 1 um helgina. Ef hann nær þriðja sæti þá verður hann meistari í fyrsta skipti, eða ef Rubens Barrichello eða Sebastian Vettel falla úr leik.

"Vettel segir að pressan sé á okkur, en við erum í sama báti. Við erum að berjast um titilinn, ég, Vettel og Barrichello. Þetta er spennandi staða en ég er með forskotið sem þeir þurfa að vinna upp", sagði Button á blaðamannfundi í Brasilíu í dag.

"Ég vaknaði með bros á vör í morgun, vitandi það að ég get orðið heimsmeistari á sunnudaginn. Ég er bara jákvæður. Ég tel að ég sé með bílinn til að klára dæmið. Ég hef aldrei mætti í keppni bara til að klára í stigasæti, en ekki til að sigra. Ég reyni allt til að vinna og hef leitt meistaramótið frá upphafi", sagði Button.

Hann hefur legið undir ámæli fyrir að sækja ekki á lokasprettinum, en hann vann sex af sjö fyrstu mótum ársins en síðan ekki söguna meir.

Fjallað er um Formúlu 1 á víðum grundvelli í þættinum Rásmarkið kl. 20.00 í kvöld á Stöð 2 Sport.

Sjá brautarlýsingu