Heimsmarkaðsverð á áli yfir 1.800 dollara á tonnið

Heimsmarkaðsverð á áli er komið í 1.811 dollara á tonnið miðað við þriggja mánaða framvirka samninga á markaðinum í London. Hefur verðið ekki verið hærra frá því í fyrrahaust. Staðgreiðsluverðið er í 1.798 dollurum.

Hagfræðideild Landsbankans fjallar um verðþróunina á áli í Hagsjá sinni. Þar segir að eftir að álverð náði hámarki í kauphöllinni í London þann 11. júlí í fyrra, en þá var dagslokaverðið tæplega 3.300 dollara á tonnið, hefur það lækkað umtalsvert. Lægst fór það niður í 1.252 dollara í lok mars.

Útflutningsverðmæti áls hefur mikið að segja um hagþróun landsins á næstunni. Samkvæmt upplýsingum Hagstofunnar var álútflutningur þriðjungur af verðmæti útfluttrar vöru á tímabilinu janúar til maí þessa árs.

Í hagspá Seðlabanka Íslands í maí-útgáfu Peningamála er gert ráð fyrir 9-10% hækkun álverðs á árunum 2010 og 2011 eftir 42% verðfall milli þessa árs og 2008. Í hagspánni er jafnframt gert ráð fyrir því að uppbygging álvers í Helguvík verði fram haldið og komist almennilega á skrið í byrjun næsta árs.

„Í spám Seðlabankans er álverið einn af lykilþáttum í auknum hagvexti þegar fram í sækir auk þess sem því er ætlað að auka útflutningstekjur," segir í Hagspánni. Samkvæmt tölunum á markaðinum í London í morgun virðast forsendur Seðlabankans ætla að standast og gott betur hvað varðar verðþróunina á álinu.

Í Hagsjánni er síðan vitnað til kynningarfundar sem forsvarsmenn Century héldu fyrir helgina en þar kom fram mikil trú á Helguvíkurverkefnið. Savgt var að Helguvík væri „heimsklassa og fyrirtaks fjárfesting fyrir hluthafa félagsins í framtíðinni".

Eftirlitsstofnun EFTA hefur staðfest fjárfestingarsamning á milli Century og íslenska ríkisins. Ennfremur kom fram í kynningunni að álframleiðsla í heiminum hefur dregist saman um 5 milljón tonn það sem af er ári, en það er umtalsvert minna en búist var við, því miklu minni framleiðslusamdráttur hefur átt sér stað í Kína.

Í júní voru framleidd um 35 milljón tonn á ársgrundvelli, samanborið við 40 milljón tonn árið 2008. Heildarframleiðsla á áli á Íslandi árið 2008 var 741 þúsund tonn skv. hagvísum Hagstofunnar og jókst um tæp 70% frá 2007. Á Íslandi voru því framleidd ríflega 2% af öllu áli í heiminum í fyrra.