Stefán býst við árangri af viðræðum Rússa við WTO

Stefán Jóhannesson sendiherra Íslands hjá Evrópusambandinu býst við árangri af aðildarviðræðum Rússa að WTO, Alþjóðaviðskiptastofnuninni, á fundi sem boðaður hefur verið um málið þann 25. maí n.k.

Stefán stjórnar vinnuhópi um aðildarviðræðurnar við Rússa en síðast var fundað um málið í mars. Stefán segir í samtali við Reuters í dag að síðasta fundur hafi verið til að fara yfir stöðuna en hann búist við meiru nú. „Ég vona að þessi fundur muni skila meiri árangri og að við náum að ganga frá nokkrum textaskjölum," segir hann.

Rússland hefur í meir en áratug reynt að gerast meðlimur WTO en nú síðast strönduðu aðildarviðræður þeirra á andstöðu Bandaríkjamanna vegna hernaðaríhlutunar Rússa í Georgíu á síðasta ári.

„Bandaríkjamenn hafa endurskoðað afstöðu sína til inngöngu Rússa í WTO," segir Stefán. „Það eru enn deilumál á borðinu eins og höfundarréttarmál, ríkisviðskipti og reglur um öryggi matvæla," segir Stefán.