Vieri hættur og farinn í mál við Inter fyrir að hlera símann sinn

Gamla markamaskínan Christian Vieri er í málaferlum við Inter þessa dagana og segist ekki hafa neinn áhuga á því að spila fótbolta lengur.

„Ég hef ekki lengur neinn metnað til þess að spila fótbolta og það freistar mín ekki einu sinni að spila á erlendri grundu," sagði Vieri sem hefur verið án félags síðan hann fór frá Atalanta í lok síðasta tímabils.

Framherjinn ferðaglaði hefur þó eitthvað að gera þessa dagana því hann hefur stefnt Inter fyrir að hlera símann sinn er hann spilaði með liðinu. Afar áhugavert svo ekki sé meira sagt.

Málið er fyrir rétti á Ítalíu þessa dagana og verður áhugavert að fylgjast með því.

Vieri er annars slyngur pókerspilari og íhugar nú að gerast atvinnumaður í póker.