Bresk þingnefnd gagnrýnir stjórnvöld fyrir Íslandsklúður

Fjármálanefnd breska þingsins gaf út álit sitt í dag á meðhöndlun bresku stjórnarinnar á íslenska bankahruninu s.l. haust. Þingnefndin gagnrýnir stjórnvöld fyrir það hvernig haldið var á málinu af þeirra hálfu, einkum frystingu á eignum íslensku bankanna og beitingu hryðjuverkalöggjafar Bretlands.

Nefndin kemst að þeirri niðurstöðu að yfirlýsingar breskra stjórnvalda um getu eða vilja íslenskra stjórnvalda til að aðstoða aðra þegna en íslenska, hvort sem það hefði staðist eða ekki, breyttu stöðu bresku stjórnarinnar frá því að vera áhorfandi að atburðarrásinni yfir í að taka virkan þátt í markaðinum.

„Með hliðsjón af því hve staðan var kvik og því hve íslensku bankarnir voru illa staddir á þessum tíma virðist sem íslensk stjórnvöld hafi talið að aðferðir breskra stjórnvalda hefðu ekkert hjálpað til," segir í álitinu.

Fram kemur í álitinu að það sé enn skoðun breskra stjórnvalda að þau hafi brugðist rétt við þeirri stöðu sem komin var upp s.l. haust og að „bráðaaðgerðir hafi verið nauðsynlegar til að tryggja efnahagslegan stöðugleika Bretlands," eins og það er orðað.

Eignir Landsbankans hefðu verið frystar þrátt fyrir fullvissu íslenskra stjórnvalda um að tryggja rétt innistæðueigenda. Ástæðan hefði verið að íslensk stjórnvöld hefðu ekki getað skýrt hvernig þetta yrði tryggt í raun og hvernig Íslendingarnir ætluðu að standa við skuldbindingar sínar.