Íslensk brunaútsala markar botninn á danska fasteignamarkaðinum

Þetta er fyrirsögn á grein í danska viðskiptablaðinu Börsen í dag um hinn aðþrengda fasteignamarkað í Danmörku. Nú eru hinsvegar teikn á lofti um að botninum á þeim markaði sé náð og uppsveiflan hefjist á ný með sölu eignasafns Atlas Ejendomme sem var í eigu Landic Property þegar það félag komst í þrot fyrr í ár.

Bæði innlendir og erlendir fjárfestingasjóðir ásamt velstæðum sjálfstæðum fjárfestum eru nú að koma inn á fasteignamarkaðinn, er haft eftir fasteignamiðlara í Börsen. Fyrst á listanum er Atlas Ejendomme en eignir þess eru nær eingöngu á Kaupmannahafnarsvæðinu.

Samkvæmt upplýsingum sem Börsen hefur aflað sér hafa 10 til 15 danskir og erlendir fjárfestar gert óskuldbindandi kauptilboð í eignasafn Atlas. Upphæðir eru ekki nefndar í þessu tilboði en Landic Property keypti Atlas í miðri uppsveiflunni fyrir nokkrum árum. Hinsvegar er talið að verðið nemi tæpum 2 milljörðum danskra kr. eða hátt í 50 milljarða kr.

Meðal eigna Atlas eru Tietgens hus og fyrrum höfuðstöðvar danska hersins við Holmens Kanal í hjarta Kaupmannahafnar.

"Það eru mörg fjárfestingarfélög, þar á meðal erlend, sem vilja nú koma inn á markaðinn og kaupa stærstu eignasöfnin," segir lögfræðingurinn Michael Ziegler hjá lögmannastofufnni Plesner sem sér um stjórn á mörgum þrotabúum og endurskipulagningu félaga á fasteignamarkaðinum.