Stofnandi You Tube fjárfestir í Formúlu 1

Chad Hurley, annar af stofnendum hins vinsæla vefsvæðis You Tube hefur ákveðið að fjárfesta í nýja USF1 liðinu frá Bandaríkjunum. Liðið byrjar að keppa í Formúlu 1 árið 2010. Hurely er margfaldur miljarðamæringur á ameríska vísu og fyrirtækið sem hann stofnaði var selt Google fyrir 1.65 miljarða dala árið 2006.

"Ég er spenntur á að takast á við nýtt verkefni og byggja upp Formúlu 1 lið frá grunni. Það fyrsta frá Bandaríkjunum í 40 ár", sagði Hurely í dag. Liðið er staðsett í Charlotte í Bandaríkjunum og hyggst finna ameríska ökumenn sér til fulltingis, en einnig kemur til greina að Alex Wurz eða Pedro de la Rosa skipi annað tveggja sæta liðsins á næsta ári. Báðir eru reyndir þróunarökumenn hjá McLaren og fleiri liðum síðustu misseri.

"Fjárfesting Hurley og reynsla í markaðssetningu er mikilvæg USF1 liðinu og á eftir að færa Formúlu 1 yfir í nýja tíma hvað fjölmiðlun varðar. Tilkoma hans á eftir að færa liðiu gæfu varðandi kostendur og umhald um liðið á margan hátt", sagði Peter Windsor, íþróttastjóri USF1. Hann var eitt sinn liðsstjóri Williams, en hefur starfað með FOM, fyrirtæki Bernie Ecclestone síðustu ár auk þess að vinna við F1 tímarítið breska.

Fjallað verður um Formúlu 1 frá ýmsum hliðum í þættinum Rásmarkið kl. 20.40 í kvöld á Stöð 2 Sport. Keppt er á Valencia brautinni á Spáni um helgina og sýnt beint frá keppninni alla helgina.