Van Persie ekki með gegn United

Arsene Wenger, stjóri Arsenal, hefur staðfest að Hollendingurinn Robin Van Persie verði ekki með Arsenal í Meistaradeildarleiknum gegn Man. Utd í næstu viku.

Van Persie er meiddur á nára og missti af leiknum gegn Liverpool á þriðjudag. Hann hefur ekki enn jafnað sig og Wenger segir engan möguleika vera á því að hann geti spilað á miðvikudag.

Stuðningsmenn Arsenal geta þó glaðst yfir því að Manuel Almunia, Johan Djorou og Emmanuel Adebayor verða klárir í slaginn.

„Við munum breyta liðinu aðeins en það eru engin vandræði eftir leikinn gegn Liverpool," sagði Wenger.

„Almunia er farinn að æfa á fullu og við bíðum og sjáum hvernig hann verður næstu daga. Sömu sögu er að segja af Djorou," sagði Wenger sem vonast til þess að geta notað Adebayor um helgina.