Ronaldinho harður á því að komast frá Milan

Þó svo Adriano Galliani, yfirmaður hjá AC Milan, hafi sagt að það komi ekki til greina að Ronaldinho fari frá félaginu fyrir aðeins sólarhring síðan er ekki enn víst að Ronaldinho komi aftur til Ítalíu.

Hann er sagður vera harður á því að vilja komast frá félaginu en hann vill spila með félagi í heimalandinu.

Ronaldinho hefur haft það afar náðugt í sumarfríi í Brasilíu og vakti það mikla athygli er það birtust myndir af honum um daginn með bumbu.

Á endanum verður það samt líklega Silvo Berlusconi, forseti og eigandi Milan, sem hefur lokaorðið í málinu.