Button: Besti sigurinn frá upphafi

Bretinn Jenson Button var kampakátur sigurvegari Formúlu 1 mótsins í Kína í dag, en var taugaspenntur um tíma þegar öryggisbíll var kallaður inn á brautina vegna óhapps. Hafði áhyggjur af stöðu sinni eftir að hafa náð forystu. "Þetta er besti sigur minn, en í hvert skipti sem maður vinnur upplifir maður besta sigurinn, en þessi þurfti mikla fyrirhöfn við erfiðar aðstæður", sagði Button á fundi með fréttamönnum. "Ég var kominn með hjartað upp í munn þegar öryggisbíllinn kom út, vissi ekki hvað myndi gerast. Ég var kominn með gott forskot og skyndilega náðu mér allir vegna öryggisbílsins, þetta gerði mér erfitt fyrir... En svo þegar ég var kominn með ný dekk undir bílinn í loki leið mér vel og bíllinn var frábær. Ég keyrði hæfilega hratt til að halda stöðunni." "Svo fór að rigna aftur í lokin, eftir að ég hafði náð ágætu forskoti á Hamilton. Ég gerði mistök í krappri beygju og fór of utarlega, en það slapp til. Ég flaut upp á köflum í bleytunni og varð að slaka á. Það var virkilega erfitt að keppa við þessar aðstæður." "Sigurinn er kærkominn og er þýðingarmikill. Við tókum réttar ákvarðanir á mikilvægum stundum. Þessi keppni snerist um útsjónarsemi og að lesa aðstæður rétt. Það að koma sekúndu á undan Hamilton í mark sýnir hvað liðið hefur gert góða hluti í mótinu", sagði Button.