Benitez ráðinn þjálfari Internazionale

Rafael Benitez verður næsti þjálfari ítalska liðsins Internazionale og tekur við starfi Jose Mourinho sem gerði ítalska liðið að þreföldum meisturum á síðasta tímabili.

Internazionale er búið að senda frá sér yfirlýsingu þar sem félagið staðfestir ráðningu Spánverjans. Benitez gerir tveggja ára samning við ítalska félagið.

Benitez fær því það verðuga verkefni að halda sigurgöngu Internazionale áfram eftir Mourinho en liðið hefur unnið ítalska meistaratitilinn fjögur ár í röð og vann Meistaradeildina í vor í fyrsta sinn í 45 ár.

Rafael Benitez hætti sem stjóri Liverpool í síðustu viku eftir sex ára starf en hafði áður verið með Valencia í þrjú ár þar sem hann gerði félagið tvisvar að Spánarmeisturum og einu sinni að Evrópumeisturum félagsliða. Liverpool vann Meistaradeildina og enska bikarinn undir hans stjórn.