Þrotabú Lehman Brothers hefur greitt 110 milljarða í laun

Skilanefndir bankanna hér á landi hafa af mörgum þótt dýrar á fóðrum. Upphæðirnar blikna þó og blána í samanburði við hvað rekstur þrotabús Lehman Brothers hefur kostað kröfuhafana.

Her af lögmönnum, endurskoðendum, ráðgjöfum og sérfræðingum vinnur að endurheimtum í þrotabú Lehman Brothers bankans í Bandaríkjunum. Bankans sem gjarnan er kenndur við upphaf hrunsins haustið 2008.

Reuters hefur reiknað það út að þrotabúið hafi hingað til greitt þessum her nokkuð yfir milljarð dollara eða yfir 110 milljarða kr. í laun og þóknanir. Launagreiðslur þessar hafi numið 40 milljónum dollara eða um 4,4 milljarði króna á mánuði að jafnaði og að þær fari hækkandi.

En það er eftir töluverðu að slægjast því bókfært virði eigna Lehman Brothers við hrunið nam 639 milljörðum dollara eða hinni stjarnfræðilegu upphæð 71.000 milljörðum króna. Það er hátt í fimmtíuföld landsframleiðsla Íslands. Að vísu er ekki reiknað er með að heimtur verði yfir 10%.

Í frétt um málið í Berlingske Tidende er haft eftir Bryan Marshal hjá ráðgjafafyrirtækinu Alvarez & Marshal, sem ber höfuðábyrgð á rekstri þrotabúsins að launagreiðslurnar séu síst of háar. Hann nefnir sem dæmi að ráðgjafafyrirtæki sitt hafi eitt og sér fundið huldar eignir að verðmæti 5 milljarða dollara.