Amy og Blake til Jamaíka og Kúbu

Söngkonan Amy Winehouse og fyrrum eiginmaður hennar, Blake Fielder-Civil, eru tekin saman aftur. Vinir þeirra segja að þau ætli að gifta sig aftur á Jamaíka í næsta mánuði. Fyrst þarf hann að vísu að klára skilorð.

Amy og Blake giftust óvænt í Miami 2007 en honum var stungið í steininn fyrir líkamsárás nokkrum mánuðum seinna. Þau skildu svo í fyrra vegna framhjáhalds hennar.

Blake var sleppt úr steininum og sendur í meðferð fyrir nokkru. Amy hafði þá sjálf tekið sig saman í andlitinu og minnkað sukkið. Hún hafði samband og þau tóku saman á ný. Kúbverskir vindlar eru meðal sameiginlegra áhugamála þeirra um þessar stundir og ætla þau að fara saman til Kúbu eftir brúðkaupið og reykja þá fínustu sem eru í boði. Þá er Amy búin að panta málverk af þeim af listmálaranum Sam Shaker, sem segir þau afar ástfangin.