AC Milan náði aðeins jafntefli gegn Lazio

Enn einu sinni mistókst AC Milan að nýta sér að erkifjendurnir í Inter tapa stigum í ítalska boltanum. AC Milan náði aðeins jafntefli við Lazio á heimavelli en Lazio er rétt fyrir ofan fallsæti.

Marco Borriello kom Milan yfir úr vítaspyrnu en Lazio jafnaði á 33. mínútu og fleiri urðu mörkin ekki, úrslitin 1-1.

Inter tapaði fyrir Roma í gær en er í toppsætinu með eins stigs forskot. Inter hefur 63 stig, Roma er með 62 og AC Milan kemur svo í þriðja sætinu með 60 stig.

Ronaldinho og Andrea Pirlo voru ekki með Milan í kvöld vegna leikbanns. Þar að auki er liðið með þá Alexandre Pato, Alessandro Nesta, David Beckham, Christian Abbiati, Amantino Mancini og Oguchi Onyewu á meiðslalistanum.