Buffon ýjar að brottför frá Juve

Gianluigi Buffon ýjaði í gær að því að hann gæti verið á förum frá Juventus en hann hefur í margar vikur verið orðaður við brottför frá félaginu.

„Ég er leikmaður Juventus í tvo leiki í viðbót. Eftir það verðum við að sjá hvað gerist. Það er ekkert ákveðið en ef ég tek einhverjar aðrar ákvarðanir en að vera hér áfram þá fáið þið að vita það," sagði Buffon við ítalska fjölmiðla eftir 1-1 jafntefli Juve gegn Catania í gær.

Bæði Man. Utd og Man. City eru sögð vera á eftir markverðinum snjalla.

„Ég vona að ég verði áfram markvörður Juve en það eina sem er öruggt er að ég verð markvörður Juve í næstu tveimur leikjum."