Uppskerubrestur í Rússlandi mun alvarlegri en talið var

Uppskerubrestur á korni í Rússlandi er talinn mun alvarlegri en þarlend stjórnvöld vilja viðurkenna.

Í frétt um málið í Politiken segir að miklir þurrkar í Rússlandi og eldsvoðar víða á akurlendum landsins í sumar hafi gert það að verkum að kornuppskera lands muni minnka úr 97 milljón tunna niður í 60 milljónir.

Þetta geri það að verkum að Rússar muni ekki setja neitt af sínu korni á heimsmarkaðinn á næstu þremur árum en ekki bara á næsta ári eins og stjórnvöld hafa gefið yfirlýsingar um.

Þar að auki muni Rússar þurfa að ganga á allar kornbirgðir sínar bara til að anna eftirspurn innanlands á næstu árum.

Þetta eru slæmar fréttir fyrir heimsmarkaðinn því Rússar hafa hingað til verið í hópi mestu útflytjenda á korni í heiminum.