Klárar stúdentinn á miðjum Evróputúr FM Belfast

Hljómsveitin Retro Stefson mun hita upp fyrir Amadou og Miriam á opnunartónleikum Listahátíðar í Reykjavík sem fram fara 12. maí næstkomandi.

Unnsteinn Manuel Stefánsson, meðlimur Retro Stefson, er mikill aðdáandi tónlistarfólksins frá Malí og hefur ákveðið að taka sér frí frá Evróputúr með hljómsveitinni FM Belfast til þess eins að geta komið fram á Listahátíðinni.

„Ég varð að koma heim ef Retro Stefson átti að geta spilað á tónleikunum þar sem ég er söngvari hljómsveitarinnar. Ég flýg heim frá Frankfurt og svo aftur út til Parísar að tónleikunum loknum. Ég missi reyndar af einum tónleikum með FM Belfast fyrir vikið en það bjargast," segir Unnsteinn, sem flaug út til Boston í gær ásamt öðrum meðlimum FM Belfast, en tónleikaferðalagi þeirra lýkur í lok maí.

„Ég kem aftur heim í lok maí og útskrifast þá úr Menntaskólanum við Hamrahlíð. Þar sem ég er úti á próftíma tek ég eitt próf í íslenska sendiráðinu í Berlín. Maður fer eftir ýmsum krókaleiðum til að láta allt ganga upp," segir hann og hlær. „Ég vona bara að flugsamgöngur standist því það er nokkuð tæpt hjá mér að fljúga þarna heim til að spila á Listahátíðinni."

Unnsteinn segir tónlist malísku listamannanna mjög líflega og einnig séu þau óhrædd að bræða heimstónlist saman við aðrar tónlistarstefnur líkt og raftónlist.

„Ég er mjög spenntur fyrir tónleikunum, enda erum við bræðurnir miklir aðdáendur. Ég vona einnig að fjölskylda mín og vinir kíki á tónleikana þar sem það verður eini tíminn sem ég hef til að hitta fólkið mitt í þessu stutta stoppi. Mig langar einnig að taka fram að boðskortum í útskriftarveisluna verður dreift á tónleikunum sjálfum," segir Unnsteinn og hlær. sara@frettabladid.is