Ungverjaland skapar ótta meðal fjárfesta

Þróun mála í Ungverjalandi hefur skapað ótta meðal fjárfesta sem eru byrjaðir að losa sig úr stöðum sínum, bæði á hluta- og skuldabréfamarkaðinum þarlendis sem og frá gjaldmiðli landsins, forintunni.

Forintan hefur fallið í verði eins og við var búist í morgun eða um 3%. Við þessu var búist eftir að Alþjóðagjaldeyrissjóðurinn og ESB ákváðu að hætta við fyrirhugaða 20 milljarða evra efnahagsaðstoð sína við Ungverjaland. Sjóðnum og ESB þóttu ungversk stjórnvöld ekki ganga nógu langt í niðurskurði sínum á opinberum fjárlögum landsins.

Á sama tíma og gengi forintunnar fellur hefur vísitalan í kauphöllinni í Budapest fallið um sömu prósentur. Á sama tíma hefur skuldatryggingaálag landsins rokið upp og vextir á þriggja ára ríkisskuldabréfum hafa hækkað um rúmar 1,5 prósentur.

Greining Danske Bank hefur áhyggjur af þessari þróun og segir að hún gæti sett efnahag austurhluta Evropu á hliðina að nýju. Í umfjöllun um málið á börsen.dk er haft eftir greiningu bankans að Ungverjaland gæti orðið hið „nýja Grikkland".