Titilslagurinn galopinn í Istanbúl í dag

Formúlu 1 mótið í Istanbúl fer fram í dag og Martin Whitmarsh hjá McLaren segir að allt sé galopið hvað titilslaginn varðar, eftir að Lewis Hamilton stakk sér á milli Mark Webber og Sebastian Vettel á ráslínunni.

Whitmarsh segir að McLaren sé að bæta sig um 0.2 til 0.3 sekúndur á milli móta og því sé liðið að mæta yfirburðunum sem Red Bull hefur haft, en Webber og Vettel eru efstir í stigamótinu og hafa náð besta tíma í öllum tímatökum ársins.

Webebr og Vettel eru með 78 stig í stigakeppni ökumanna, en Fernando Alonso er með 73 og Jenson Button 70. Felipe Massa er með 60 og Robert Kubica og Lewis Hamilton 59. Red Bull leiðir stigamót bílasmiða með 156 stig, Ferrari er með 136 og McLaren 129.

"Red Bull mun ekki standa í stað. Þetta er gott lið og við verðum bara að gæta þess að framþróa bíla okkar hraðar en þeir. Titilslagurinn er galopinn og við sjáum hvað við getum gert hér (í Istanbúl) og vinnum svo í þróun bílsins í næstu mótum. Það er of snemmt að gefast upp á titilslagnum að mínu mati", sagði Whitmarsh.

Lewis Hamilton og Jenson Button, ökumenn McLaren eru í öðru og fjórða sæti á ráslínu, en Webber fremstur og Vettel þriðji.

"Fyrstu tveir hringirnir verða mjög erfiðir. Við vorum á bensínléttum bíl í tímatökunni og mætum í mótið á bensínþungum bíl og óvíst hvernig dekkin hitna og hvernig bíll lætur. Það verður allt annað að keyra gegnum beygju átta og sá sem ekur af mestri mýkt verður fljótastur", sagði Hamilton, en beygja átta í brautinni er í raun samsett úr fjórum beygjum og ræður miklu um hve góðum tímum ökumenn ná í hverjum hring. Margir lentu í vandræðum í beygjunni á æfingum og í tímatökunni um helgina

Mótið í dag er í beinni útsendingu á Stöð 2 Sport og hefst útsendingin kl. 11.30, en þátturinn Endamarkið er svo á dagskrá kl. 14.15, eða skömmu eftir að mótshaldinu lýkur.

Sjá brautarlýsingu