Sneijder búinn að semja við Inter

Wesley Sneijder hefur gengið frá nýjum fimm ára samningi við ítalska úrvalsdeildarliðið Inter.

Viðræður Sneijder við Inter hafa verið mikið í fjölmiðlum undanfarnar vikur og um tíma var talið að hann myndi yfirgefa félagið. Þá var hann helst orðaður við Manchester United.

Sjálfur sagði Sneijder ávallt að hann yrði líklega áfram og nú er ljóst að sú verður raunin.

Sneijder þykir hvað líklegastur til að hljóta Gullbolta FIFA en hann varð þrefaldur meistari með Inter á síðasta tímabili og komst í úrslitaleik HM með hollenska landsliðinu.