FIH selur hluti sína í Sjælsö Gruppen

FIH Aztec Holding og FIH Finance hafa selt alla hluti sína í fasteignafélaginu Sjælsö Gruppen. Þetta kemur fram í tilkynningu frá FIH bankanum sem til skamms tíma var í íslenskri eigu.

Samtals var um að ræða rétt tæp 5% af heildarfjölda hluta í Sjælsö eða rúmlega 3,8 milljónir hluta. Ekki er greint frá verðinu per hlut en það hefur legið á bilinu 20 til 25 danskrar kr. undanfarna mánuði. Miðað við það hefur FIH fengið hátt í 100 milljónir danskra kr. fyrir þessa hluti eða um 2 milljarða kr.

Sem fyrr segir var FIH til skamms tíma í íslenskri eigu en skilanefnd Kaupþings og Seðlabankinn seldu FIH í haust. Formlega verður gengið frá sölunni þann 6. janúar n.k.

Sjælsö Gruppen er stærsta fasteignafélag Danmerkur og um tíma átti FIH 17% hlut í félaginu. Stærsti hluthafinn í Sjælsö er hinsvegar SG Nord Holding með 25% hlut. SG Nord Holding er svo aftur að hluta til, eða 30%, í eigu Cube Properties sem er skráð til heimilis á Kýpur.

Cube Properties hét áður Novator Properties og var að 69% í eigu þeirra feðga Björgólfs Guðmundssonar og Björgólfs Thor Björgólfssonar gegnum félagið Samson Holdings. Þrotabú Samson Holding á nú um 60% af hlutunum í Cube Properties. Kröfuhafar Samson séu svo aftur íslenskir og þýskir bankar ásamt lífeyrisjóðum.