Kaupþing reynir að selja verðmæta eign í London

Fjallað er um málið á vefsíðunni building.co.uk. Eignin sem um ræðir er við Noho Square og var upphaflega keypt af Candy bræðrunum árið 2006 með 175 milljón punda lánveitingu frá Kaupþingi. Meðal þess sem byggja átti á eigninni voru 200 lúxusíbúðir.

Tony Pidgley forstjóri Berkeley Group staðfestir að áhugi sé til staðar á eigninni en að Berkley sé ekki tilbúið að greiða „símanúmersverð" fyrir eiginina.

Kaupþing vill fá 125 milljónir punda eða um 24 milljarða kr. fyrir þessa eign en Pidgley segir að fyrir ári síðan hafi verið rætt um verðmiða upp á 70 milljónir punda. Hann spyr hvernig á því standi að verðið hafi tvöfaldast á þeim tíma sem liðinn er. Verðmat Berkeley liggur á bilinu 50 til 70 milljónir punda.

CB Richard Ellis hefur tilkynnt fyrir hönd Kaupþings að boði hæstbjóðenda í eignina verði tekið.