Gífurleg fjölgun opinberra starfsmanna í Danmörku

Gífurleg fjölgun hefur orðið á ráðningum opinberra starfsmanna í Danmörku. Samkvæmt tölum frá hagstofu landsins fjölgaði þeim um 14.500 á öðrum ársfjórðungi ársins m.v. sama tímabil í fyrra.

 Í frétt um málið í Jyllands Posten segir að frá árinu 2007 hafi fjöldi opinberra starfsmanna í landinu aukist óvenjumikið eftir að hafa haldist nokkuð stöðugur árin 2002 til 2007 í um 730.000 manns. Þannig hafi fjöldi starfsmannanna aukist um 16.000 árið 2008 og um 18.000 í fyrra.

Jacob Graven aðalhagfræðingur Sydbank segir að þessar tölur séu í hrópandi ósamræmi við það sem er að gerast í einkageiranum þar sem störfum hafi fækkað mikið.

„Þessi þróun getur ekki staðist og mun hafa ófyrirsjáanlegar afleiðingar fyrir fjármál hins opinbera," segir Graven. „Rekstur hins opinbera hefur farið úr því að skila afgangi upp á 80 milljarða króna árið 2007 og yfir í halla upp á sömu upphæð í ár."