Inter tapaði tveimur mikilvægum stigum

Ítalíumeistarar Inter urðu að sætta sig við jafntefli, 2-2, er liðið sótti Fiorentina heim í ítölsku úrvalsdeildinni í kvöld.

Keirrison kom Fiorentina yfir á 11. mínútu og þannig stóðu leikar allt þar til á 74. mínútu er Diego Milito jafnaði leikinn fyrir Inter. Eto´o kom svo Inter í 1-2 með marki níu mínútum fyrir leikslok.

Per Kroldrup jafnaði aftur á móti leikinn mínútu síðar og þar við sat.

Inter er eftir leikinn með tveggja stiga forskot á toppi deildarinnar en hefur leikið einum leik meira en Roma sem er í öðru sæti.