Viðskipti erlent

Batman hasarblað sló Superman út í verðmæti

Sjaldgæft eintak af Batman hasarblaði frá árinu 1939 var selt á uppboði fyrir yfir eina milljón dollara. Þar með sló það verðmet Superman en nýlega seldist fyrsta útgefna hasarblaðið með Superman á eina milljón dollara eins og greint var frá hér á síðunni í gærdag.

Batman blaðið sem hér um ræðir er Detective Comics No. 27 en uppboðið fór fram í Dallas í Texas. Bæði seljandi og kaupandi óskuðu nafnleyndar að því er segir í frétt um málið á BBC.

Barry Sandoval talsmaður uppboðshússins Heritage í Dallas segir að aldrei í sögunni hafi meira verð fengist fyrir gamalt hasarblað. „Verðið sem fékkst fyrir þetta eintak var langt umfram væntingar okkar," segir Sandoval.

Þegar Detective Comic No. 27 kom út 1939 kostaði það 10 sent. Það fylgir sögunni að seljandi blaðsins nú hafi greitt 100 dollara fyrir eintakið árið 1960.

Samkvæmt sérfræðingum var það alltaf í kortunum að Superman eða Batman myndu rjúfa milljón dollara múrinn hvað verðmæti hasarblaða með þessum ofurhetjum varðar.







Mest lesið


Fleiri fréttir

Sjá meira


×

Mest lesið