Mascherano of dýr fyrir Inter - Ætla sér Melo í staðinn

Javier Mascherano er of dýr fyrir Inter Milan. Þess í stað ætlar félagið að reyna að kaupa Felipe Melo frá Juventus. Rafael Benítez ætlar að styrkja miðju Inter og var talið nær öruggt að Mascherano fylgdi honum. Sky segir í dag, og vitnar í Massimo Moratti forseta Inter, að Mascherano sé ekki lengur á óskalista félagsins. "Mascherano er sterkur leikmaður, en það er ólíklegt að hann komi. Hann kostar einfaldlega of mikið og það er ekki víst að Liverpool sé tilbúið til að selja hann," sagði Moratti. "Melo er áhugaverður kostur og við munum vinna að því núna," sagði forsetinn en hinn 26 ára gamli Brasilíumaður er ekki jafn dýr og Argentínumaðurinn. Moratti segir jafnframt að Mario Balotelli og Diego Milito fari ekki frá félaginu en staðfesti að Maicon gæti farið til Real Madrid.