Ronaldinho með þrennu fyrir AC Milan

Brasilíumaðurinn Ronaldinho skoraði þrennu fyrir AC Milan þegar liðið vann 4-0 sigur á Siena í ítölsku deildinni í dag. AC Milan minnkaði forskot nágrannanna í Inter í sex stig með þessum góða sigri en Inter náði aðeins 2-2 jafntefli á móti Bari á laugardaginn.

Leonardo byrjaði þjálfaraferillinn ekki vel með AC Milan en hann fann fljótlega leiðina að Ronaldinho sem hefur spilað frábærlega að undanförnu. Það hjálpaði reyndar AC Milan að þeir voru manni fleiri frá tólftu mínútu leiksins.

Ronaldinho skoraði fyrsta mark Milan úr vítaspyrnu sem Marco Borriello fékk 12. mínútu og Borriello bætti síðan við öðru marki skömmu síðar. Ronaldinho skoraði síðan af stuttu færi efir hornspyrnu David Beckham í seinni hálfleik og innsiglaði síðan þrennuna með stórglæsilegu skoti.