Björgólfur: Þurfum ekki að hafa áhyggjur af því að raka snjóinn af vellinum

Björgólfur Takefusa skoraði tvö síðustu mörk KR í kvöld þegar liðið vann 4-0 sigur á Fram og tryggði sér sæti í bikaúrslitaleiknum.

„Það var jafnræði í leiknum til að byrja með en við nýtum okkur liðsmuninn. Það er oft þegar lið verða einum manni fleiri þá virkar það oft öfugt. Við gerðum það gífurlega vel í dag að nýta okkur liðsmuninn og sýna karakter með því að keyra yfir þá," sagði Björgólfur.

„Það er frábært að vera komnir í bikarúrslitaleikinn því þetta er langstærsti leikur ársins. Það er sérstaklega gaman að komast í hann núna þegar við þurfum ekki að hafa áhyggjur af því hvort við náum að raka snjóinn af vellinum eða ekki," sagði Björgólfur í léttum tón.

„Þetta er gífurlega gaman og maður vonast eftir því að sú stemmning sem var á þessum leikjum þegar ég var yngri sé kominn aftur. Þá var troðfullur völlur og þetta er leikur til þess, frábær dagsetning og tvö frábær lið. Það verður gaman að fá að taka þátt í þessum leik," sagði Björgólfur.

„Við erum að byrja vel undir stjórn Rúnars og nú er bara að fylgja þessu eftir," sagði Björgólfur um frábæra byrjun Rúnars Kristinssonar en hvað hefur hann gert?

„Það er kominn meiri léttleiki en ég veit kannski ekki hvað hann er búinn að gera nákvæmlega. Rúnar er einn af betri knattspyrnumönnum Íslands og hans fótboltaheili er frekar stór. Það hjálpar þegar hann kemur með ábendingar í leikjum og deilir með okkur sínum hugsunum og pælingum," segir Björgólfur.

Björgólfur hefur verið duglegur að skora á móti Fram síðustu ár og er þegar kominn meðfjögur mörk gegn Safamýrarliðinu á þessu sumri.

„Mér finnst það mjög skemmtilegt að vera búinn að skora svona mikið á móti Fram. Það eru fínir strákar þarna inn á milli en yfir höfuð er þetta ekki uppáhaldsliðið mitt. Það skiptir ekki máli að ná að skora í þeim leik því þetta er undanúrslitaleikur og þá snýst þetta bara um að ná að vinna," segir Björgólfur kátur og bætti síðan við:

„Það er frábært að fara inn í helgina vitandi það að við erum komnir inn í bikarúrslitaleikinn," sagði Björgólfur að lokum.