Formúla 1 á Stöð 2 Sport næstu þrjú árin

Undirritaður hefur verið nýr samningur milli 365 miðla og eiganda Formúlu 1 keppninnar um áframhaldandi sjónvarpsrétt til næstu þriggja ára samkvæmt fréttatilkynningu frá 365 miðlum. Í fréttatilkynningunni segir ennfremur;

„Samningurinn nær því til þriggja næstu mótaraða, eða til loka árs 2013. Nýi samningurinn ætti að vera mikið fagnaðarefni fyrir alla áhugamenn um Formúlu 1 kappaksturinn enda hefur umfjöllun um Formúlu 1 verið stóraukin og bætt þegar kemur að beinum útsendingum, upphitunarþáttum og samantektarþáttum, eftir að Stöð 2 Sport tryggði sér fyrst sýningaréttinn frá og með árinu 2008.

Í ár hefur verið boðið uppá hvorki fleiri né færri en fimm útsendingar um hverja mótshelgi, þar af fjórar í beinni útsendingu. Á föstudögum er byrjað á að sýna frá æfingum keppnisliða, lokaæfingin tekur við á laugardegi, því næst tímatakan og svo að sjálfsögðu kappaksturinn sjálfur sem ávallt er í beinni útsendingu, rétt eins og lokaæfing og tímataka. Því til viðbótar hafa sérfræðingar farið yfir gang mála í kappakstrinum í sérstökum þætti að kappakstri loknum í beinni útsendingu og sýnt allt það athyglisverðasta sem gerðist í móti helgarinnar.

Keppnistímabilið í Formúlu 1 hefur sjaldan verið eins spennandi og í ár,en þegar þremur mótum er ólokið eiga fimm ökumenn enn möguleika á meistaratitlinum. Keppt verður á nýrri braut í Suður-Kóreu um næstu helgi. Síðustu tvö mótin verða í Brasilíu og Abu Dhabi í nóvember.

Á næsta ári verða 20 mótshelgar í beinni útsendingu á Stöð 2 Sport en það er fjölgun um eina mótshelgi frá því í ár, þar sem nýtt mót verður á Indlandi.

Formúlu 1 kappaksturinn hefst 13. mars í Barhrein á næsta ári og lýkur í Abu Dhabi 27. nóvember en líklegt er talið að 24 ökumenn verði á ráslínu, rétt eins og í ár.

Formúla 1 er ein vinsælasta og eftirsóttasta íþrótt sem sýnt er frá í sjónvarpi en hún hefur verið stunduð frá árinu 1950 eða í 60 ár. Allt frá því Stöð 2 Sport hóf sýningar frá Formúlunni í mars 2008 hefur hún fengið hvað mest áhorf allra dagskrárliða stöðvarinnar og unnið sér fastan sess hjá áskrifendum.“