Auðkýfingurinn stoltur af Formúlu 1 liðinu

Auðkýfingurinn Richard Branson er bakhjarl Virgin Formúlu 1 liðsins sem var kynnt á vefsíðu liðsins í morgun. Ökumenn liðsins eru Timo Glock sem áður var hjá Toyota og Lucas di Grassi sem er nýliði en var um tíma þróunarökumaður Renault.

Virgin bíllinn notast við Cosworth vél og er hannaður í tölvu í stað vindganga af Manor Motorsport liðinu breska, en Virgin fyrirtæki Branson er aðal styrktaraðili liðsins.

"Þvílíkur bíll. Nick Wirth hefur lagt sig verulega fram og eiga sviðsljósið skilið. Það er búið að vera frábært að fylgjast með framþróun bílsins, en við munum sjá á Jerez brautinni í næstu viku hversu fljótur bíllinn reynist. Það er búið að vera mikið verk að koma þessu liði heim og saman. Það verður gaman að sjá hverju fram vindur með liðð næstu árin og ég er spenntur að sjá bílinn í fyrsta mótinu", sagði Branson.