Heimsins dýrasta frímerki selt

Heimsins dýrasta frímerki var selt á uppboði í Genf í gær, fullyrðir Ritzau fréttastofan. Frímerkið er svokallaður „Gulur þrískildingur" og er hluti af frímerkjaröð sem byrjað var að gefa út í Svíþjóð árið 1855. Gulur þrískildingur var prentaður í grænu. Það sem gerir eintakið sem seldist um helgina svo sérstakt er að það var óvart prentað í gulum lit.

Sænskur drengur fann frímerkið árið 1885 og seldi það á sjö krónur sænskar. Síðan þá hefur það gengið kaupum og sölum. Síðast var það selt árið 1996 og fór það þá á um það bil 350 milljónir íslenskra króna.

Það var uppboðshaldarinn David Feldman sem bauð frímerkið upp í gær. Þar á bæ gefa menn ekki upp kaupverðið en fullyrða að frímerkið sé það dýrasta í veröldinni. Þar er líka fullyrt að kaupandinn hafi talið að frímerkið væri góð fjárfesting á krepputímum.