Benitez ætlar að vinna fleiri titla en Mourinho

Rafa Benitez, þjálfari Inter, er ansi brattur þessa dagana og hann óttast það ekkert að þurfa að fylla skarð José Mourinho hjá Inter.

Það sem meira er þá ætlar Benitez að vinna fleiri titla en Mourinho gerði með félagið. Það hefur verið mikill rígur á milli Benitez og Mourinho allt frá því þeir þjálfuðu báðir í ensku úrvalsdeildinni.

Mourinho gerði Inter að Ítalímeisturum tvö ár í röð. vann bikarinn með liðinu sem og Meistaradeildina.

"Mancini var sigursæll hér sem og Mourinho. Ég vonast til þess að vinna fleiri titla en þeir gerðu," sagði Benitez sem er þegar búinn að vinna einn bikar með Inter er liðið vann meistarakeppnina á Ítalíu.

"Við getum unnið sex titla á þessu tímabili og erum þegar komnir með einn. Það voru samt leikmennirnir sem unnu þann bikar en ekki þjálfarinn.

"Rígurinn á milli okkar Mourinho er faglegur. Hér áður fyrr áttum við í frábæru sambandi en það góða samband endaði þegar við (Liverpool) slógum Chelsea út úr Meistaradeildinni á sínum tíma," sagði Benitez.