Stjórnarformaður BAA segir úrbóta þörf vegna óveðursins

Sir Nigel Rudd, stjórnarformaður BAA sem á Heathrow flugvöll í Bretlandi, segir að eigendur fyrirtækisins verði að samþykkja viðbrögð hans við ábendingum vegna ringulreiðar á Heathrow flugvelli í síðustu viku. Ellegar segi hann af sér stjórnarformennsku.

Síðasta vika var erfið fyrir flugrekstur í Bretlandi og víðar um heim. Ástæðan var gríðarlegt óveður sem skók Bretland, Skandínavíu og meginland Evrópu. Það olli töfum á flugi marga daga í röð.

BAA mun láta rannsaka í þaula hvernig hægt er að bregðast við óveðri eins og því sem var í siðustu viku og gera úrbætur með niðurstöður rannsóknarinnar til hliðsjónar.

Ferrovial er stærsti hluthafi í BAA og Nigel segir að þeir verði að bregðast við. „Ef hluthafar, ekki bara Ferrovial, heldur líka aðrir - myndu hindra okkur í að gera úrbætur á Heatrow sem ég teldi nauðsynlegar, þá myndi ég þurfa að segja af mér. En ég vil taka taka það fram að það hefur aldrei gerst og ég býst ekki við að það muni gerast í framtíðinni," er haft eftir Nigel á vef Telegraph.