Apple orðið stærra en Microsoft

Apple fyrirtækið, sem framleiðir iPod og iPhone, er orðið stærra en Microsoft og þar með stærsta tæknifyrirtæki í heiminum.

Hlutabréf í Apple hækkuðu um 1% í gær og var markaðsvirði fyrirtækisins þá komið upp í 222 milljarða bandaríkjadala, sem nemur um 29 þúsund milljörðum íslenskra króna. Markaðsvirði Microsoft nemur hins vegar 219 milljörðum dala.

Apple á samt langt í land með að ná orkufyrirtækinu ExxonMobil, sem er verðmætasta fyrirtæki í heimi. Daily Telegraph segir að verðmæti þess nemi um 282 milljörðum bandaríkjadala eða tæpum 37 þúsund milljörðum íslenskra króna.