Ancelotti spáir Roma titlinum

Carlo Ancelotti, knattspyrnustjóri Chelsea, segir að Roma hafi það sem þarf til að verða ítalskur meistari. Liðið skaust upp í toppsæti deildarinnar með sigri í gær.

Inter gerði jafntefli á laugardag og er Roma nú með eins stigs forystu. „Það kemur mjög á óvart að Roma hafi náð að ýta Inter úr efsta sætinu. Claudio Ranieri hefur verið að gera frábæra hluti með Roma," sagði Ancelotti.

„Liðið er á miklu skriði og á góða möguleika á því að verða meistari. Ranieri er sjálfur Rómverji og liðið gerði hárrétt með að ráða hann. Hann hefur gert góða liðsheild og ég gleðst yfir velgengni þeirra," sagði Ancelotti sem lék með Roma í sex ár.