Langtímaatvinnuleysi eykst hratt í Danmörku

 

Langtímaatvinnuleysi eykst hratt í Danmörku og ef heldur sem horfir glíma um 60.000 Danir við langtímaatvinnuleysi um næstu áramót. Fyrir tveimur árum var fjöldi þeirra 15.000 talsins.

Í frétt um málið í Jyllands Posten kemur fram að fjöldi langtímaatvinnulausra jókst um 3.000 manns mánuðina maí og júní og voru þá 51.000 slíkir í landinu. Þetta atvinnuleysi hefur nú aukist 16 mánuði í röð. Með langtímaatvinnuleysi er átt við fólk sem verið hefur á atvinnuleysisskrá í allt að eitt ár.

 

Tölurnar eru byggðar á úttekt heildarsamtaka verkalýðsfélaganna í Danmörku en Lars Andersen forstjóri efnahagsráðs þeirra segir að dönsk stjórnvöld hafi verið alltof sein í að hefja baráttu sína gegn þessu vandamáli og stöðva þróunina.

 

Andersen bendir á að því lengur sem fólk er á atvinnuleysisskrá því erfiðara verður fyrir það að útvega sér vinnu að nýju. Hann leggur m.a. til að krepputími sé notaður til að mennta fólk, þannig að þeir sem vilja mennta sig frekar í sinni starfsgrein geti fengið sérstak orlof til þess. Á móti fá atvinnulausir á meðan að ganga í störfin sem losna með þessum hætti.