Spalletti: Margir sköllóttir menn í Mílanó

Sprelligosinn Luciano Spalletti segist ekkert hafa heyrt í forráðamönnum Inter á Ítalíu. Spalletti er þjálfari Zenit frá Pétursborg en hefur verið orðaður við stöðuna hjá Inter.

Spalletti er fyrrum þjálfari Roma. „Ég er mjög ánægður hér í Rússlandi og er ekki á förum. Ég hef ekki verið í sambandi við Inter eða neitt annað lið í Evrópu. Það er verk aðð vinna með Zenit og er þegar farinn að undirbúa næstu leiktíð," sagði Spalletti.

Spalletti gerði Zenit að rússneskum meisturum á dögunum. Það sást til hans í Mílanó á miðvikudag og fóru þá sögur á kreik um að hann væri að taka við Inter. Evrópumeistararnir hafa ollið miklum vonbrigðum á tímabilinu og eru sem stendur í sjöunda sæti undir stjórn Rafa Benítez.

„Var ég í Mílanó? Það er margir sköllóttir menn þar, það þarf ekkert endilega að hafa verið ég," sagði Spalletti í gamansömum tón.