Hülkenberg: Tilfinningarík upplifun að ná besta tíma

Nico Hülkenberg á Williams Cosworth frá Þýskalandi náði fremsta stað á ráslínu í fyrsta skipti í Formúlu 1 í dag, en þessi 23 ára ökumaður varð heimsmeistari í GP2 mótaröðinni í fyrra. Hann varð sekúndu á undan Sebastian Vettel á Red Bull. Williams liðið er þrautreynt lið og margfalt meistaralið, en hefur ekki verið í toppslagnum undanfarinn ár, en margir frægir ökumenn hafa ekið með liðinu. Núna er Hülkenberg og Brasilíumaðurinn Rubens Barrichello liðsfélagar hjá Williams og Frank Williams hefur áhuga á að gera margra ára samning við Hulkenberg samkvæmt frétt á dögunum á autosport.com, en Willi Weber sem var umboðsmaður Michael Schumacher er umboðsmaður Hulkenberg. Einnig kemur til greina að Williams ráði Pastor MacDonaldo sem hefur keppt í GP2 í ár. Hülkenberg var að vonum ánægður með afraksturinn í dag. "Þetta var einstakt. Ég trúi vart að ég hafi náð þessu og liðið á miklar þakkir skildar fyrir að útbúa bílinn fyrir tímatökuna. Það var rétt ákvörðun að setja bílinn á þurrdekk og tæknimenn mínir sögðu mér að ég ætti einn hring eftir og ég var þegar í góðri stöðu. Kreisti þess vegna allt útúr bílnum og reyndi að keyra af mýkt og sleppa hjá blautum köflum á brautinni og varna mistökum. Það var óvænt ánægja að ná besta tíma. Ég er mjög, mjög ánægður og ég nýt augnabliksins.", sagði Hülkenberg en aðstæður breyttust hratt á þornandi brautinni í lok tímatökunnar. "Það er tilfinningarík upplifun að ná besta tíma í fyrsta skipti og vonandi söguleg stund, því ég vill vera í Formúlu 1 mörg, mörg ár. Ég á ekki til orð til að lýsa því hvernig mér líður. Ég er enn uppspenntur eftir hringinn og tryllinginn. Ég þarf að átta mig á því hvaða árangri við höfum náð og vinna okkar verk á morgun", sagði Hülkenberg Bein útsending er frá kappakstrinum á Stöð 2 Sport kl. 15.30 á sunnudag í opinni dagskrá.