Ecclestone fékk göngugrind með væng og stýri í 80 ára afmælisgjöf

Bernie Ecclestone sem stýrir gangi mála í Formúlu 1 á 80 ára afmæli 28. október, eftir tvo daga og í tilefni af því brugðu Red Bull menn á leik og gáfu honum göngugrind með væng og stýri þar sem hann á að geta valið um Viagra, kraft, hjúkrunarkonu, lögfræðing, bókhaldara og aðstoðarkonu sína.

Yfirmaður Red Bull liðsins, Christian Horner og Sebastian Vettel afhentu Ecclestone gripinn í bílskýli liðsins í Suður Kóreu á sunnudaginn og slógu á létta strengi með þessu, en autosport.com greinir frá afhendingunni.

Á f1.com er snaggaralegt viðtal við Ecclstone í tilefni af væntanlegu afmæli, en hann hefur verið afar útsjónarsamur í uppbyggingu á Formúlu 1 gegnum tíðina og lætur ekki deigan síga, þó hann sé að verða áttræður.

Ecclestone hefur verið mjög klókur í viðskiptum, en hann var sölumaður notaðra bíla. En fyrstu kynni hans af akstursíþróttum voru þau að hann keppti sjálfur.

"Ég keppti á mótorhjólum og bílum og keypti svo Brabham liðið (í Formúlu 1). Ég hef alltaf verið innviklaður i akstursíþróttir. Ég byrjaði að keppa og rak fyrirtæki. Kappakstur var áhugamál."

Ecclstone hætti þó að keppa í kappakstri og hugsaði meira um viðskiptalífið.

"Það var ekki spurning um að vera nógu góður. Heldur spurning um hvað ég vildi leggja mikið á mig. Ég var með fyrirtæki og það var mikilvægara en að keppa. Ég hætti því", sagði Ecclestone og sagðist oft hafa verið heppinn í lífinu og viðskiptum.

"Fólk þarf að grípa tækifærin þegar þau gefast. Margt fólk fer í gegnum lífið og segir að það hefði átt að gera hitt og þetta. Ég nýtti tækifærin", sagði Ecclestone.

Hann hefur peninga, völd og hefur átt velgengni að fagna. Aðspurður hverjum af þessum þremur þáttum hann myndi vera til í að sleppa sagði Ecclestone;

"Ég myndi helst ekki vilja vera án peninga, en þeir eru þó ekki það mikilvægasta í lífinu. Velgengni? Velgengni er nokkuð sem maður fær þegar maður nær árangri. Að vera án velgengni er eins og að liggja í bælinu allan daginn."

Aðspurður um hvaða sýn Ecclestone hefur á framtíð Formúlu 1 sagði Ecclestone;

"Ég hef meiri áhyggjur af næsta ári! Sá sem segist geta sagt þér i dag hvað gerist eftir þrjú ár hefur rangt fyrir sér. Annars værum við ekki að fást við þau vandamál sem eru í gangi þessa dagana."