Balotelli fór í treyju AC Milan

Ungstirnið Mario Balotelli hjá Inter var ekki að auka vinsældir sínar þegar hann ákvað að klæðast treyju AC Milan. Það gerði hann í sjónvarpsþætti og myndir af uppákomunni eru út um allt á netinu.

Balotelli mætti í vinsælan skemmtiþátt í heimalandinu þar sem honum var gefin treyjan. Þegar hann hélt að búið væri að slökkva á myndavélunum ákvað hann að gantast og skella sér í treyjuna.

Því hefði hann betur sleppt því stuðningsmenn Inter eru æfir yfir atvikinu.

Umboðsmaður Balotelli hefur verið í yfirvinnu í allan dag við að slökkva elda og segir að menn megi ekki gera of mikið úr þessu. Þarna hafi ungur strákur aðeins verið að grínast.

Balotelli mátti varla við þessari uppákomu því hann er þegar í skammarkróknum hjá þjálfaranum, Jose Mourinho, en þeir lentu í rifrildi á dögunum.