Leonardo líklegastur til að taka við af Benitez

Þó svo Massimo Moratti, forseti Inter, segi að Rafa Benitez verði ekki rekinn sem þjálfari Inter eru ítalskir fjölmiðlar ekki að kaupa það.

Þeir segja að Brasilíumaðurinn Leonardo sé efstur á óskalista Inter yfir arftaka Benitez. Leonardo þekkir vel til í Mílanó eftir að hafa leikið með AC Milan og síðan þjálfað liðið.

Það sló síðan ekki á sögusagnirnar þegar sást til Moratti og Leonardo snæða hádegismat saman.

Hermt er að Moratti hafi kallað Benitez á neyðarfund eftir tapið gegn AC Milan um síðustu helgi og að stjórn félagsins vinni í því að tryggja sér nýjan þjálfara í hans stað.

Sjálfur er Benitez pollrólegur og segist ekki óttast um starf sitt.