FIFA hagnast um yfir 400 milljarða á HM í Suður Afríku

Þess er vænst að Alþjóðaknattspyrnusambandið FIFA muni hagnast um 3,2 milljarða dollara eða yfir 400 milljarða króna á Heimsmeistaramótinu í fótbolta (HM) sem nú stendur yfir í Suður Afríku.

Þessi mikli hagnaður kemur í kjölfar þess að stjórnvöld í Suður Afríku hafa ákveðið að FIFA fái sérstaka skattafslætti af tekjum sínum af mótinu.

Samkvæmt frétt á vefsíðunni Monyweb mun FIFA hafa knúið í gegn þessa afslætti í samningaviðræðum sínum við stjórnvöld fyrir mótið. Meðal þess sem FIFA sleppur við að borga er tekjuskattur og tollagjöld. Þar að auki mun FIFA eitt eiga höfundarrétt á öllu útsendingar- og fjölmiðlaefni frá mótinu.

Talið er að þessir samningar hafi kostað Suður Afríku tugi milljarða í töpuðum tekjum af mótinu. Nicolas Maignot talsmaður FIFA sagði á blaðamannafundi um helgina að Heimsmeistaramótið væri aðaltekjulind sambandsins og eigi að standa undir öllum útgjöldum FIFA næstu fjögur árin.