Reynsla úr titilslagnum hjálpar meistaranum

Forystumaður stigamótsins, Jenson Button mundi frekar kjósa að fá þurra keppni í Barcelona en rigningu, en spáð er að rigng geti á mótssvæðinu um helgina.

"Það er mikilvægt að fá þurra mótshelgi. Ef það er blautt og okkur gengur vel, þá er það frábært. En við þurfum að vita eins og aðrir hvar við stöndum með bílinn í samaburði við keppinautanna. Við viljum sem hagstæðust úrslit, en við þurfum að vita hvort við erum á réttri leið með bílinn vegna tímabilsins framundan", sagði Button á fundi með fréttamönnum í Barcelona í dag, en greint er frá spjalli hans á vesetri autosport.com.

Button er með 60 stig í stigakeppni ökumanna, en Nico Rosberg er með 50, svo koma Fernando Alonso og Sebastian Vettel með 49.

"Ég tel að Red Bull sé með fljótasta bílinn og hafa verið fljótir í tímatökum. Við höfum náð flestum stigum, þó að bíllinn hafi ekki verið sá fljótasti. En við þurfum að bæta bílinn til að skáka Red Bull. Við getum ekki náð titlinum nema ná bílnum á fremsta stað á ráslínu", sagði Button og ljóst að Red Bull má ekki sleppa frá McLaren í tímatökum árinu, eins og til þessa.

"Ég finn ekki fyrir neinni pressu og það er frábært. Á síðasta ári var miðhluti tímabilsins mér erfiður og ég átti erfitt þegar kólnaði á brautum vegna akstursstíls míns. En ég lærði á þessum erfiðleikatíma."

"Þegar maður er að berjast um meistaratitil, þá eru ekki öll mót góð og maður verður að gleyma þegar verr gengur og einbeita sér að þeim mótum sem vel gekk í. Þá mætir maður með meira sjálfstraust í næsta mót og afslappaðri", sagði Button.

Button vill síður rigningarkeppni