Böndum komið á fjármálakerfi Bandaríkjanna

Bandaríska öldungadeildin hefur samþykkt frumvarp sem felur í sér mestu umbætur á fjármálareglum sem gerðar hafa verið í Bandaríkjunum frá fjórða áratugi síðustu aldar.

Frumvarpið var samþykkt með 59 atkvæðum gegn 39 og næsta skref er að sameina það svipuðu frumvarpi sem samþykkt var í fulltrúadeildinni í desember. Þetta þykir mikill sigur fyrir Barack Obama Bandaríkjaforseta sem hefur heitið því að almenningur þurfi aldrei aftur að greiða fyrir mistök fjármálafurstanna á Wall Street. Hann fagnar því að frumvarpið hafi náð í gegn þrátt fyrir að þrýstihópar sem gangi erinda Wall Street hafi reynt að koma í veg fyrir brautargengi þess.

Með frumvarpinu verður sterkari böndum komið á bankana og önnur fjármálafyrirtæki auk þess sem lántakendur þurfa að gangast undir mun ítarlegra greiðslumat en hingað til. Þá verður nýrri eftirlitsstofnun komið á fót sem meðal annars verður ætlað að hafa eftirlit með flóknum afleiðuviðskiptum sem talin eru hafa átt stóran hlut í efnahagskreppunni sem nú hrjáir heimsbyggðina. Búist er við að frumvarpið verði að lögum fyrir fjórða júlí í sumar.