Xavi ósáttur við dómgæsluna

Spænski landsliðsmaðurinn og leikmaður Barcelona, Xavi, hefur gagnrýnt dómarann Undiano Mallecano eftir markalaust jafntefli Barcelona og Espanyol um helgina.

Barcelona tapaði tveimur dýrmætum stigum í titilbaráttunni en Real Madrid á nú möguleika á að minnka forskot þeirra niður í aðeins eitt stig.

„Hann gaf mikið af aðvörunum en spjöldin fylgdu aldrei í kjölfarið. Leikmenn Espanyol spiluðu nálægt okkur og pressuðu stíft.

Okkur leið í raun aldrei vel inn á vellinum. Dómarinn hjálpaði liðinu sem var ekki tilbúið að spila fótbolta. Þetta var magnþrunginn leikur og dómarinn fór oft illa að ráði sínu," sagði Xavi ósáttur.