Gennaro Gattuso hetja AC Milan í kvöld

Gennaro Gattuso var skúrkurinn þegar AC Milan tapaði á móti Tottenham í Meistaradeildinni á dögunum en hann var hetja liðsins í 1-0 sigri á Juventus í ítölsku A-deildinni í kvöld.

Gattuso skoraði eina mark leiksins á 68. mínútu leiksins þegar hann kom Gianluigi Buffon, markverði Juventus, á óvart með óvæntu skoti.

AC Milan náði með þessum sigri átta stiga forskoti á nágranna sína í Internazionale sem eiga leik inni á móti Genoa á morgun. AC Milan liðið er búið að vinna fjóra deildarleiki í röð og hefur ekki tapað í deildinni í ellefu leikjum eða síðan 18. desember.

Þetta var fyrsta mark Gennaro Gattuso á tímabilinu í 31 leik í öllum keppnum og jafnframt fyrsta mark hans í ítölsku deildinni síðan 23. janúar 2008 eða í rúm þrjú ár.

Juventus-liðið tapaði þarna í sjöunda skipti í síðustu ellefu leikjum og liðið situr nú í 7. sæti deildarinnar heilum tuttugu stigum á eftir AC Milan.