King harðlega gagnrýndur fyrir ummæli sín

Mervyn King, seðlabankastjóri í Bretlandi, þarf nú að sæta harðri gagnrýni frá virtum hagfræðingum eftir viðvaranir sínar vegna breska bankakerfisins. King sagðist óttast að önnur fjármálakreppa væri framundan ef ekki yrðu gerðar breytingar á bankakerfinu.

Það eru einkum fyrrverandi efnahagsráðgjafi ríkisstjórnarinnar og formaður Samtaka breskra banka sem gagnrýna seðlabankastjórann. Sá fyrrnefndi, Tim Congdon, segir að ummæli seðlabankastjórans séu fullkomlega óréttlætt.

„Sannleikurinn er sá að fjármálageirinn er mjög mikilvægur fyrir breskt hagkerfi. Hann hefur starfað hjá Seðlabankanum í 20 ár. Mér finnst það alveg ótrúlegt að hann sé núna að ráðast á skipulag kerfisins,“ segir Congdon. „Ef þú gagnrýnir bankana þá dregur þú úr trúverðugleika þeirra og þá hefur fólk áhyggjur af þeim. Það mikilvægasta er að hjálpa bönkunum,“ bætir Congdon við.

„Við virðum seðlabankastjórann mjög mikið. En í þessu tilfelli er fjölmargt sem við gagnrýnum,“ segir Angela Knight, formaður Samtaka breskra banka.