Edge innlánin notuð til að falsa gengi Kaupþingshluta

Kevin Stanford stjórnarformaður All Saints, og fyrrum í hópi stærstu viðskiptavina Kaupþings, heldur því fram að Kaupþing hafi notað það fé sem lagt var inn á Edge reikninga bankans til þess að falsa gengið á hlutabréfum Kaupþings.

Þetta kemur fram á vefsíðunni RetailWeek. Þar er vitnað í bréf frá Stanford þar sem hann heldur því fram að Kaupþing hafi haft þann háttinn á að lán auðugum viðskiptavinum sínum það fé sem kom inn á Edge reikningana í dótturbankanum Singer & Friedlander með því skilyrði að viðkomandi lánþegar keyptu hluti í Kaupþingi fyrir hluta af lánunum.

Það sem Stanford heldur fram er hrein markaðsmisnotkun en verið er að rannsaka ýmis dæmi um víðtæka markaðsmisnotkun Kaupþings hér á landi og erlendis.

Þegar Kaupþing, og þar með Singer & Friedlander, hrundi haustið 2008 áttu um 160.000 eintaklingar og lögaðilar fé inn á Edge reikningunum. Tap breska ríkisins af því að bjarga þessum reikningum með því að skutla þeim inn í hollenskan banka er talið nema 213 til 307 milljörðum kr. eftir því hve vel gengur með endurheimturnar úr þrotabúum Singer & Friedlander og Kaupþings.